La me nona, poareta, che adesso è in paradiso, gavea una fede in DIO che non posso spiegar e con la corona in man, êla dizea che pregar el Rosàrio in fameia è pestar nel scalin che porta al paradiso.
Mi ricordo tante olte che quando una persona partiva di questo mondo, fra le so man zera el rosário, una certeza dea sua identità cristiana. La corona zera un strumento santo che se trovava ntele scarsele dei preti, frati, móneghe e tanti altri. Anca picada ntel legno del leto sù la testiera, zera li che aspetea la nona che prima de dormir la catea in man e col nono la girava fra le ave maria e padre nostro.

Ma quando mi, me fradèl e tuta la fameia, (ma fa tempo sai) al fin dea giornata del laoro, ascoltea el nono che mezo cativo ciamea noantri par pregar. Ma vara che non se potea anca sofiar un pò forte, far qualche scherso nea preghiera, parche dopo de finir, certamente una guerra saria fata. Non potea nhanca moverse. E ghenera de quei che se indenociava davanti una carega postada in torno ala tàola dela cosina par pregar la corona. Con un segno dela Santa Crose, se scominsea el primo mistero, quelo che contempla l`anunsiassion del Àngelo a Maria e suito adrio, le Ave Marie:
“- Ave Maria, piena de gràsia, el Signor l`è con Vu, benedeta sia Vu fra le done, e benedeto l`è el fruto del Vostro ventre, Gesù.”
Dopo noantri, tuti insieme, rispondea:
“Santa Maria, madre de Dio, pregha par noantri pecatori, ades e nea ora dea nostra morte. Amén.”
Mi vardea el nono, che insieme a nona gavea anca lu un rosario, par vede se già era al fin del giro che lu faceva con le mane, pensa che par noi ancora putèi, far quel laoro tuti i di, zera un pò faticoso.
In nome del Pare e del Fiol e deo Spirito Santo, Amèn. Pronto, ze finito.... se pol anca moverse ades.

Par Fábio Dalló