La me nona, poareta, che ades è in paradiso, gavea una fede in DIO che non se pol spiegar . Zêra sempre con la corona in man, êla dizea che pregar el rosàrio in fameia è pestar nel scalin che porta al paradiso.
Mi ricordo tante olte che quando una persona partiva di questo mondo, fra le so man zêra el rosàrio, la certeza dea so identità cristiana. La corona zêra un strumento santo che se trovea ntele scarsele dei preti, frati, moneghe e tanti altri. Anca picada sù la testiera del leto, zêra li che aspetea la nona che prima de dormir la catea in man e col nono la girava fra le ave maria e pare nostro.
Ma quando mi, me fradèl e tuta la fameia, (ma fa tempo sai) al fin dea giornata del laor, sentiva el nono che mezo cativo ciamea noantri par pregar, i savea che zê rivada la ora. Ma vara che non se potea gnanca sofiar un pò forte, far qualche scherso nea preghiera, parche dopo finir el rosário, certamente una guera saria fata. Non potea ghanca moverse. E ghenera de quei che se indenociava davanti una carega postada in torno ala tàola dea cosina par pregar. Con un segno dea Santa Crose, se scominsea el primo mistéro, queo che contempla l`anunsiassion del Àngelo a Maria e suito vegnea le Ave Marie:
“- Ave Maria, piena de gràsia, el Signor l`è con Vu, benedeta sia Vu fra le done, e benedeto l`è el fruto del Vostro ventre, Gesù.”
Dopo noantri, tuti insieme, rispondea:
“Santa Maria, madre de Dio, pregha par noantri pecatori, ades e nea ora dea nostra morte. Amen.”
Mi vardea el nono, che insieme a nona gavea anca lu un rosário, par vede se già era al fin sensa desmentegar qualche preghiera, alora stava sempre atento “al giro” che lu facea con le mane, pensa che par noi ancora putèi, far quel laoro tuti i di, zêra un pò faticoso.
In nome del Pare e del Fiol e deo Spirito Santo, Amen. Pronto, ze finio.... se pol anca moverse ades.

Dirce peruchi Dalló e João Dalló.